Te Hākari Tapu

Nā te Whānau a te Karaiti

Hīmene

Te Whakaoho

Ka hui te iwi, ka karangatia.

Minita

Tihei, Mauriora:
Ki te wheiao, ki te ao mārama.

Maranga, whakatīaho,
kua tae mai tōu māramatanga.
Kua maiangi te korōria o te Atua ki a koe:
Kua hui mai ngā iwi ki tōu māramatanga.
Kia mataara, tirohia atu,
kei te hui mai te nuinga,
kei te whakaeke.
E Ihowā, ko wai e tomo ki tōu whare tapu?
Ko wai hoki e piki ki tōu maunga tapu? Waiata 15:2

Minenga

Ko ia e tapatahi ana te haere,
he tika te mahi,
e kōrero pono ana i roto i tōna ngākau.
Uakina mai ngā tatau o te tika,
kia tomo atu ahau,
kia whakamoemiti ki a Ihowā. Waiata 115:19

Ko tēnei rānei

Nā te Whānau a te Karaiti 499

Minita

Kia whakapaingia te tangata
e haere mai ana i runga i te ingoa o Ihowā.
Ka whakapaingia koutou e mātou
i roto i te whare o Ihowā.
Nau mai, haere mai, i runga i te ingoa o Ihowā. Waiata 118:26

Minenga	Tukua mai tōu pono me tōu mārama, hei arahi, hei kawe i ahau ki tōu maunga tapu, ki tōu whare.Waiata 43:3
Minita	Tomokia ōna tatau i runga i te whakawhetai: ōna marae i runga i te whakamoemiti.Waiata 100:3

Te Whakawātea

Minenga

E te Atua Kaha Rawa
e tuwhera ana ngā ngākau katoa ki a koe,
e mōhiotia ana ngā hiahia katoa,
e kore hoki e ngaro i a koe te mea huna:
whakahangia iho tōu Wairua Tapu,
hei whakamā i ngā whakaaro o mātou ngākau,
kia tino aroha ai mātou ki a koe,
kia tika ai te whakanui i tōu ingoa tapu:
ko Īhu Karaiti nei tō mātou Ariki.
Āmine.

Whakarāpopoto i ngā Ture. Te Ture Hou rānei.

Ngā Kupu whakamārie.

500 Te Hākari Tapu

Te Whākinga Hara

Minenga

E te Matua Kaha Rawa,
he hira ake nei tōu aroha noa i tōu riri,
tēnei tāu whānau te tuohu nei i mua i tōu aroaro,
te whakaae nei kua hē mātou ki a koe,
kua takatakahi i āu ture tapu
i te poka kē o ngā whakaaro, i te horihori o ngā kupu,
i te rere kē o ngā mahi.
Kua hara mātou ki a koe i runga
i te ngoikore, i te kūare, i te mārō o ngā kakī.
Kia aroha mai ki a mātou, murua atu ō mātou hara,
wetekia ngā mekameka e here nei i a mātou.
Meinga mātou kia tapu,
kia tū wātea i mua i tōu aroaro,
hei mea kia whakanuia ai tōu ingoa tapu:
ko Īhu Karaiti hoki tō mātou Kai-whakaora.
Āmine.

Te Wetekanga Hara

Pirihi anake

He Aroha te Atua,
e pūmau ana āna mahi tohu
ki te hunga e tahuri pono ana ki a ia,
e whāki ana i ō rātou hara.
Kua tukua mai e ia te mana unu i te hara ki āna minita
i runga i te kaupapa i poua e tāna Tama e Īhu Karaiti.
I runga i tōna ingoa,
ka wetekia ō koutou hara,
ka unuhia ngā māuiui,
ngā taimahatanga i runga i a koutou.
Māna koutou e whakatapu, e whakahou.
Māna koutou e whakakaha i roto i ngā mahi pai katoa,
e whakaū kei taea te whakakorikori:
e arahi hoki ki te Ora Tonu;
ko Īhu Karaiti hoki tō tātou Kai-wawao.
Āmine.

Nā te Whānau a te Karaiti 501

Te Mihi

Minita

Kia noho a Ihowā ki a koutou.

Minenga

Ki a koe anō hoki.

Minita

Tēnā koutou e te whānau kua tatū mai nei
i runga i tō reo pōwhiri a tō tātou Ariki:
Haere mai ki ahau e koutou katoa e māuiui ana
e taimaha ana, ā, māku koutou e whakaokioki.
Tēnei te mihi atu nei ki a koutou ki te Hāhi a te Atua
kua whakatapua nei i roto i a Karaiti Īhu,
kua karangatia hei hunga whiriwhiri māna,
arā, koutou e whakahua nei i tōna ingoa tapu.

Waha mai ngā mate kei runga i a koutou
kia mihia, kia tangihia, kia maharatia,
e tātou e te Hāhi.

Kua tūhono rātou te Hunga Tapu ki a rātou,
kua wātea i ngā raru o tēnei ao.
Tātou ka whakawhetai ki tō tātou Atua.
Ka hari te hunga mate e mate ana i roto i te Ariki.

Āe ra, e ai tā te Wairua,
kua okioki rātou i ā rātou mahi.
Kia īnoi tātou.

Minenga

E te Ariki tohu,
meinga ngā wairua o te hunga pono
kua mawehe atu ki a koe,
kia okioki i runga i te rangimārie.
Kia tīaho mai anō tōu māramatanga ki a rātou.
Meinga mātou kia uru tahi atu me rātou
ki tōu haringa mutunga kore.
Āmine.

502 Te Hākari Tapu

Minita

Kua mihia ngā mate,
kua mihia koutou,
kua whakawāteatia.

Tātou ka huri ki te whakamoemiti ki a Ihowā,
ki tāna Tama ki tō tātou Kai-whakaora;
ki te Wairua Tapu ki tō tātou Kai-whakamārie;
i runga i te waiata e kīa nei ko te Korōria.

Te Korōria

Korōria ki te Atua i runga rawa,
he maungārongo ki tōna iwi i runga i te whenua.

E te Ariki e te Atua, e te Kīngi o te rangi,
e te Atua Kaha rawa e te Matua,
ka koropiko mātou ki a koe, ka whakawhetai,
ka whakamoemiti ki a koe mō tōu korōria.

E te Ariki e Īhu Karaiti,
te Tama kotahi a te Matua,
e Ihowā e te Atua, e te Reme a te Atua,
e waha atu nei i ngā hara o te ao:
tohungia mātou,
e noho mai nā koe i te ringa matau o te Matua:
whakarongo mai ki tā mātou īnoi.

Ko koe anake te Tapu,
ko koe anake te Ariki,
ko koe anake te Runga Rawa,
e Īhu Karaiti,
me te Wairua Tapu,
i roto i te korōria o te Atua Matua.
Āmine.

Nā te Whānau a te Karaiti 503

Kawa mo te Kupu

Minita	Kia noho a Ihowā ki a koutou.
Minenga	Ki a koe anō hoki.

Te Kaupapa o te Rā

Te Rārangi o te Rā

Te Īnoi o te Rā

Kawenata Tawhito

Tuhituhi

Ka mutu tō kōrero i te Kawenata Tawhito, i te Tuhituhi hoki,
ka mea te kai-pānui i tēnei.

Kai-pānui	Ko te Kupu tēnei a te Ariki.
Minenga	Kia whakapaingia te Atua.

Hīmene

Rongopai

Ka pānuitia te tīmatanga o te Rongopai ka mea te minenga

Kia whakapaingia koe e te Ariki.

Ka mutu me mea

Kia whakamoemititia koe e te Karaiti.

Kauwhau

Te Whakapono

Kupu tautoko a te whakaminenga kei ngā whārangi 494, 496.

504 Te Hākari Tapu

Te Īnoi Takawaenga

Kei ngā whārangi 496-498.

Me waiho te īnoi mō te hunga mate ki waho. Kua īnoia ngā īnoi mō rātou i te
tīmatanga.

Te Kawa mo te Hākari

Pirihi	E te whānau, ko tātou te tinana o te Karaiti.
Minenga	Nā te Wairua kotahi tātou i iriiri hei tinana kotahi.
Pirihi	Kia ū ki te kotahitanga o te Wairua, he mea paihere nā te rangimārie.
Minenga	Āmine.
Pirihi	Kua oti te tuhituhi, ‘Ki te mauria e koe tāu koha ki te ahurewa, ā, ka maumahara kua hē koe ki tōu hoa, waiho tāu koha i reira. Mātua houhia te rongo, ka tāpae ai i tāu koha’.
Minenga	E te whānau, e ngā hoa aroha; mehemea kua hē ahau ki tētahi, unuhia tāku hē me ahau hoki e unu nei i te hē o tētahi ki ahau i mua i tō koutou aroaro, i te aroaro anō hoki o te Ariki, o te Rangi.
Pirihi	Ka koa te hunga hohou rongo, ka kīa rātou he tamariki nā te Atua. Kia tau te rangimārie o te Atua ki a koutou.
Minenga	Ki a koe anō hoki.

Hīmene

Mō konei te ohaoha, te hohou rongo.

Nā te Whānau a te Karaiti 505

Te Tāpae Tuatahi

Pirihi	Nōu e Ihowā te wehi, te mana, te ihi, te tapu.
Minenga	Nāu ngā mea katoa o te rangi, o te whenua, ēnei koha ka tāpaea atu nei.
Pirihi	Whakapaoho iho e te Wairua Tapu, e te Atua Ora: Manakohia mai mātou me ēnei koha ka tāpaea atu nei.

Te Whakawhetai Nui

Pirihi	Kia ara ō koutou ngākau.
Minenga	Ka ara nei ki te Ariki.
Pirihi	Kia whakapai tātou ki tō tātou Atua.
Minenga	Ko te mea tika anō tēnā.
Pirihi	He mea tika, he mahi whakahari te whakapai atu ki a koe i ngā wā katoa, i ngā wāhi katoa, e Ihowā, e te Matua Kaha Rawa, Ora Tonu: i runga i te ingoa o tāu Tama o Īhu Karaiti, o tō mātou Kai-whakaora. Rā roto mai i a Ia, waihangatia ana e koe ngā mea katoa, me te tangata anō hoki kia rite ki tōu te āhua. Nāu mātou i whakawātea i te hara i tāu tukunga mai i tāu Tama, kia whānau mai hei tangata, kia whakamatea i runga i te Rīpeka, kia whakaarahia. Nāna mātou i meinga ai e koe kia tapu, i tāu tukunga mai i tōu Wairua Tapu, Wairua whakaora. Koia mātou ko te hunga Tapu e okioki nei i roto i a Ia, me te ope whakahirahira o te rangi, ka whakamoemiti ai ki a koe, ka mea.

506 Te Hākari Tapu

Minenga

Tapu, Tapu, Tapu Rawa a Ihowā
te Atua o te Mana o te Kaha:

Kī tonu te rangi me te whenua i tōu korōria.
Kia hira ake tōu nui i runga rawa.

Kia whakapaingia a Ia
e haere mai nei i runga i te ingoa o te Ariki:
Kia hira āke tōu nui i runga rawa.

Te Īnoi Whakatapu

Me tūturi.

Pirihi anake

Kia hira ake te korōria te whakawhetai ki a koe
e te Matua Tapu,
mōu i hōmai i tāu Tama i a Īhu Karaiti
hei tino patunga tapu mō te hara o te ao,
kia whiwhi ai ki te ora tonu
te hunga e manako ana ki a Ia.
Nāna hoki te whakahau kia maharatia tōna matenga
ā kia hoki mai rā anō Ia.
Koia mātou e whakarite nei i te kupu tapu
a tāu Tama a Īhu Karaiti
i tāna pounga i tēnei Hākarameta Tapu.

Waihoki, nō te pō i mua i tōna rīpekatanga,
ka tango Ia i te Taro,
ā, ka mutu te whakawhetai ka whawhati,
ka hoatu ki āna ākonga,
ā, ka mea:
Tangohia, kainga:
Ko tōku tinana tēnei ka tukua nei mō koutou:
meinga tēnei hei whakamahara ki ahau.

Ka mutu te hapa, ka mau Ia ki te Kapu,
ā, ka mutu te whakawhetai ka hoatu ki a rātou,
ka mea:
Inumia tēnei e koutou katoa.
Ko ōku toto ēnei ka whakahekea mō koutou,
mō te tokomaha, hei murunga hara.
Meinga tēnei i ngā inumanga katoatanga,
hei whakamahara ki ahau.

Nā te Whānau a te Karaiti 507

	Nō reira e te Matua Tapu, mōna i whakaae kia whakamatea Ia ki runga i te rīpeka, ka whakareia e koe ki runga rawa, hoatu ana ki a Ia he ingoa kei runga ake i ngā ingoa katoa e taea te whakahua i te rangi, i te whenua, i raro i te whenua; Koia hoki mātou ka tuohu ai, ka whakaae ai Ko Īhu Karaiti te Ariki, hei whakakorōria i a koe e te Matua Tapu.
Minenga	Kia whakakorōriatia koe e Īhu e te Ariki. Ka whakaatu mātou i tōu matenga. Ka pānui i tōu whakaaranga, Ka tatari atu i tōu hokinga mai. Āe rā: Nau mai e Īhu e te Ariki.

Tāpae Tuarua

Pirihi

Waihoki e te Matua Aroha,
i a mātou e tatari atu nei ki te taenga mai o tōu
rangatiratanga,
tēnei mātou te whakarite nei i te ōhākī a tāu Tama,
kia maumahara ki tō mātou hokonga
ki tēnei Taro o te Ora;
ki tēnei Kapu o te Whakaoranga.
Ahakoa kāhore mātou e tau,
manakohia mai rā mātou, me ēnei whakamoemiti,
whakawhetai hoki, ka tāpaea atu nei.

Whakakīa mātou ki tōu Wairua Tapu.
Mā tōna aroha noa me tōna mana e mea mātou
kia kotahi kua whakawhiwhia nei ki ēnei mea tapu,
kia uru atu hoki ki te tinana o Īhu Karaiti.

508 Te Hākari Tapu

Minenga

Ki a koe e te Matua Kaha Rawa,
te korōria me te hōnore, te whakanui, te whakapai,
i konei, i ngā wāhi katoa;
ināianei, ā, mō āke tonu atu. Āmine.

Īnoi a te Ariki

Kua ākona nei tātou e te tātou Ariki,
ka īnoi tātou

E tō mātou Matua i te rangi
Kia tapu tōu Ingoa.
Kia tae mai tōu rangatiratanga.
Kia meatia tāu e pai ai
ki runga ki te whenua,
kia rite anō ki tō te rangi.
Hōmai ki a mātou āianei
he taro mā mātou mō tēnei rā.
Murua ō mātou hara,
Me mātou hoki e muru nei
i ō te hunga e hara ana ki a mātou.
Aua hoki mātou e kawea kia whakawaia;
Engari whakaorangia mātou i te kino:
Nōu hoki te rangatiratanga, te kaha,
me te korōria,
Āke ake ake. Āmine.

Te Whatiwhatinga i te Taro

Pirihi	Ko te taro e whatiwhatīa nei e tātou, he tohanga nō te tinana o te Karaiti.
Minenga	Ko tātou tokomaha he tinana kotahi: nō te mea e kai tahi ana tātou i te tinana kotahi.

Nā te Whānau a te Karaiti 509

Īnoi Whakapāpaku

E te Ariki tohu,
ehara i te mea he whakapakari
ki a mātou mahi tika
i haere mai ai mātou ki tāu tepu e tū nei,
engari he whakaaro ki te nui o āu mahi tohu.
Kāhore mātou e tau hei kohikohi
i ngā kongakonga i raro i tāu tepu;
otirā, ko taua Ihowā nei anō koe,
he mahi tūturu nāu te atawhai.
Meinga kia tika tā mātou kai
i te tinana o tāu Tama aroha, o Īhu Karaiti,
kia tika tā mātou inu i ōna toto,
kia noho tonu ai mātou ki roto ki a Ia,
me Ia hoki ki roto i a mātou. Āmine.

Te Reme a Te Atua

Ko tēnei rānei

E te Reme a te Atua, e waha atu nei i te hara o te ao,
tohungia mātou.
E te Reme a te Atua, e waha atu nei i te hara o te ao,
tohungia mātou.
E te Reme a te Atua, e waha atu nei i te hara o te ao,
whakarongo ki tā mātou īnoi.

Te Karanga

Pirihi

Haere mai koutou,
tangohia te tinana me ngā toto
o tō tātou Ariki o Īhu Karaiti,
hei whakamahara i mate Ia mō koutou.
Kainga whakaponotia i roto i ō koutou ngākau,
me te whakawhetai anō.

510 Te Hākari Tapu

Ngā Kupu Toha

Minita

Te tinana o tō tātou Ariki i tukua mōu.
Ngā toto o tō tātou Ariki i whakahekea mōu.

Poroporoaki

Minenga

E te Matua aroha,
kua manakohia nei mātou,
kua whāngaia ki ēnei kai tapu, arā, ki te tinana,
ki ngā toto o tō mātou Kai-whakaora, o Īhu Karaiti
hei manaaki, hei whakakaha i a mātou i ōna huanga,
hei tuitui hoki i a mātou ki a Ia, tētahi hoki ki tētahi.
Tēnei mātou te whakawhetai nei ki a koe i a mātou
ka haere atu ki ngā mahi i karangatia e koe.

Tukua mātou kia haere i runga i te rangimārie,
i a mātou ka whiwhi nei ki tāu whakaoranga.

Te Manaakitanga

Pirihi

Haeremai, haere,
ki te ao whānui i runga i te rangimārie.
Kia māia, kia kaha.
Kia ū ki te mea tika.
Kaua e utua te kino ki te kino
engari manaakitia,
ngā hunga e tūkino ana i a koe.
Kua riro mai nei i a koutou te mārama,
tohaina ki te ao.
Āmine.

Ko tēnei rānei

Nā te Whānau a te Karaiti 510.a

Kia ū ki tō koutou Ariki;
mahi atu ki a Ia i runga i te hari
i runga hoki i te mana
o te Wairua Tapu.
Āmine.

Ko tēnei rānei

Kia tau mai anō ki a koutou,
ngā manaakitanga a te Atua Kaha Rawa,
a te Matua, a te Tama, a te Wairua Tapu.
Āmine.

510.b Te Hākari Tapu