Te Hākari Tapu

Nā te Whānau a te Karaiti

Hīmene

Te Whakaoho

Ka hui te iwi, ka karangatia.

Minita

Tihei, Mauriora:
Ki te wheiao, ki te ao mārama.

Maranga, whakatīaho,
kua tae mai tōu māramatanga.
Kua maiangi te korōria o te Atua ki a koe:
Kua hui mai ngā iwi ki tōu māramatanga.
Kia mataara, tirohia atu,
kei te hui mai te nuinga,
kei te whakaeke.
E Ihowā, ko wai e tomo ki tōu whare tapu?
Ko wai hoki e piki ki tōu maunga tapu? Waiata 15:2

Minenga

Ko ia e tapatahi ana te haere, he tika te mahi, e kōrero
pono ana i roto i tōna ngākau.
Uakina mai ngā tatau o te tika, kia tomo atu ahau,
kia whakamoemiti ki a Ihowā. Waiata 115:19

Ko Tēnei Rānei

Minita

Kia whakapaingia te tangata e haere mai ana i runga i te ingoa o Ihowā. Ka whakapaingia koutou e mātou i roto i te whare o Ihowā. Nau mai, haere mai, i runga i te ingoa o Ihowā. Waiata 118:26

Minenga

Tukua mai tōu pono me tōu mārama, hei arahi, hei
kawe i ahau ki tōu maunga tapu, ki tōu whare.Waiata 43:3

Minita

Tomokia ōna tatau i runga i te whakawhetai:
ōna marae i runga i te whakamoemiti.Waiata 100:3

Te Whakawātea

Pirihi anake

E te Atua Kaha Rawa
e tūwhera ana ngā ngākau katoa ki a koe,
e mōhiotia ana ngā hiahia katoa,
e kore hoki e ngaro i a koe te mea huna:
whakahangia iho tōu Wairua Tapu,
hei whakamā i ngā whakaaro o mātou ngākau,
kia tino aroha ai mātou ki a koe,
kia tika ai te whakanui i tōu ingoa tapu:
ko Ihu Karaiti nei tō mātou Ariki.
Āmine.

Whakarāpopoto i ngā Ture. Te Ture Hou rānei.

Ngā Kupu whakamārie.

Te Whākinga Hara

Minenga

E te Matua Kaha Rawa, he hira ake nei tōu aroha noa i tōu riri, tēnei tāu whānau te tuohu nei i mua i tōu aroaro, te whakaae nei kua hē mātou ki a koe, kua takatakahi i āu ture tapu i te poka kē o ngā whakaaro, i te horihori o ngā kupu, i te rere kē o ngā mahi. Kua hara mātou ki a koe i runga i te ngoikore, i te kūare, i te maro o ngā kakī. Kia aroha mai ki a mātou, murua atu ō mātou hara, wetekia ngā mekameka e here nei i a mātou. Meinga mātou kia tapu, kia tū wātea i mua i tōu aroaro, hei mea kia whakanuia ai tōu ingoa tapu: ko Ihu Karaiti hoki tō mātou Kai-whakaora. Āmine.

Te Wetekanga Hara

Pirihi anake

He Aroha te Atua, e pūmau ana āna mahi tohu ki te hunga e tahuri pono ana ki a ia, e whāki ana i ō rātou hara. Kua tukua mai e ia te mana unu i te hara ki āna minita i runga i te kaupapa i poua e tāna Tama e Ihu Karaiti. I runga i tōna ingoa, ka wetekia ō koutou hara, ka unuhia ngā māuiui, ngā taimahatanga i runga i a koutou. Māna koutou e whakatapu, e whakahou. Māna koutou e whakakaha i roto i ngā mahi pai katoa, e whakaū kei taea te whakakorikori: e arahi hoki ki te Ora Tonu; ko Ihu Karaiti hoki tō tātou Kai-wawao.
Āmine.

Te Mihi

Minita

Kia noho a Ihowā ki a koutou.

Minenga

Ki a koe anō hoki.

Minita

Tēnā koutou e te whānau kua tatu mai nei i runga i tō reo pōwhiri a tō tātou Ariki: Haere mai ki ahau e koutou katoa e māuiui ana e taimaha ana, ā, māku koutou e whakaokioki. Tēnei te mihi atu nei ki a koutou ki te Hāhi a te Atua kua whakatapua nei i roto i a Karaiti Ihu, kua karangatia hei hunga whiriwhiri māna, arā, koutou e whakahua nei i tōna ingoa tapu.

Waha mai ngā mate kei runga i a koutou kia mihia, kia tangihia, kia maharatia, e tātou e te Hāhi.

Kua tūhono rātou te Hunga Tapu ki a rātou, kua wātea i ngā raru o tēnei ao. Tātou ka whakawhetai ki tō tātou Atua. Ka hari te hunga mate e mate ana i roto i te Ariki.

Āe ra, e ai tā te Wairua, kua okioki rātou i ā rātou mahi. Kia inoi tātou.

Minenga

E te Ariki tohu, meinga ngā wairua o te hunga pono kua mawehe atu ki a koe, kia okioki i runga i te rangimārie. Kia tīaho mai anō tōu māramatanga ki a rātou. Meinga mātou kia uru tahi atu me rātou ki tōu haringa mutunga kore.   Āmine.

Minita

Kua mihia ngā mate, kua mihia koutou, kua whakawāteatia.

Tātou ka huri ki te whakamoemiti ki a Ihowā, ki tāna Tama ki tō tātou Kai-whakaora; ki te Wairua Tapu ki tō tātou Kai-whakamārie; i runga i te waiata e kīa nei ko te Korōria...

Te Korōria

Korōria ki te Atua i runga rawa,
he maungārongo ki tōna iwi i runga i te whenua,

E te Ariki e te Atua, e te Kīngi o te rangi,
e te Atua Kaha rawa e te Matua,
ka koropiko mātou ki a koe, ka whakawhetai,
ka whakamoemiti ki a koe mō tōu korōria.

E te Ariki e Ihu Karaiti, te Tama kotahi e te Matua,
e Ihowā e te Atua, e te Reme e te Atua,
e waha atu nei i ngā hara o te ao:
tohungia mātou,
e noho mai na koe i te ringa matau o te Matua:
whakarongo mai ki tā mātou inoi.

Ko koe anake te Tapu,
ko koe anake te Ariki,
ko koe anake te Runga Rawa,
e Ihu Karaiti,
me te Wairua Tapu,
i roto i te korōria o te Atua Matua.     Āmine.

Kawa mo te Kupu

Minita

Kia noho a Ihowā ki a koutou.

Minenga

Ki a koe anō hoki.

Te Kaupapa o te Rā

Te Rarangi o te Rā

Te Inoi o te Rā

Kawenata Tawhito

Tuhituhi

Ka mutu tō kōrero i te Kawenata Tawhito, i te Tuhituhi hoki,
ka mea te kai-pānui i tēnei.

Kai-pānui

Ko te Kupu tēnei a te Ariki.

Minenga

Kia whakapaingia te Atua.

Hīmene

Rongopai

Ka pānuitia te tīmatanga o te Rongopai ka mea te minenga

Kia whakapaingia koe e te Ariki.

Ka mutu me mea

Kia whakamoemititia koe e te Karaiti.

Kauwhau

Te Whakapono  Kupu tautoko a te whakaminenga
kei ngā whārangi 494, 496.

Te Inoi Takawaenga  kei ngā whārangi 496-498.

Me waiho te inoi mō te hunga mate ki waho. Kua inoia ngā inoi mō rātou i te
tīmatanga.

Te Kawa mo te Hākari

Pirihi

E te whānau, ko tātou te tinana o te Karaiti.

Minenga

Nā te Wairua kotahi tātou i iriiri hei tinana kotahi.

Pirihi

Kia ū ki te kotahitanga o te Wairua,
he mea paihere na te rangimārie.

Minenga

Āmine.

Pirihi

Kua oti te tuhituhi, ‘Ki te mauria e koe tāu koha ki te ahurewa, ā, ka maumahara kua hē koe ki tōu hoa, waiho tāu koha i reira. Mātua houhia te rongo, ka tāpae ai i tāu koha’.

Minenga

E te whānau, e ngā hoa aroha; mehemea kua hā ahau ki tētahi, unuhia tāku hē me ahau hoki e unu nei i te hē o tētahi ki ahau i mua i tō koutou aroaro, i te aroaro anō hoki o te Ariki, o te Rangi.

Pirihi

Ka koa te hunga hohou rongo, ka kīa rātou he tamariki nā te Atua. Kia tau te rangimārie o te Atua ki a koutou.

Minenga

Ki a koe anō hoki.

Hīmene

Mō konei te ohaoha, te hohou rongo.

Te Tāpae Tuatahi

Pirihi

Nōu e Ihowā te wehi, te mana, te ihi, te tapu.

Minenga

Nāu ngā mea katoa o te rangi, o te whenua, ēnei koha ka tāpaea atu nei.

Pirihi

Whakapaoho iho e te Wairua Tapu, e te Atua Ora: Manakohia mai mātou me ēnei koha ka tāpaea atu nei.

Te Whakawhetai Nui

Pirihi

Kia ara ō koutou ngākau.

Minenga

Ka ara nei ki te Ariki.

Pirihi

Kia whakapai tātou ki tō tātou Atua.

Minenga

Ko te mea tika anō tēnā.

Pirihi

He mea tika, he mahi whakahari te whakapai atu ki a koe i ngā wā katoa, i ngā wāhi katoa, e Ihowā, e te Matua Kaha Rawa, Ora Tonu: i runga i te ingoa o tāu Tama o Ihu Karaiti, o tō mātou Kai-whakaora.

Rā roto mai i a Ia, waihangatia ana e koe ngā mea katoa, me te tangata anō hoki kia rite ki tōu te āhua.

Nāu mātou i whakawātea i te hara i tāu tukunga mai i tāu Tama, kia whānau mai hei tangata, kia whakamatea i runga i te Rīpeka, kia whakaarahia.

Nāna mātou i meinga ai e koe kia tapu, i tāu tukunga mai i tōu Wairua Tapu, wairua whakaora.

Koia mātou ko te hunga Tapu e okioki nei i roto i a Ia, me te ope whakahirahira o te rangi, ka whakamoemiti ai ki a koe, ka mea.

Minenga

Tapu, Tapu, Tapu Rawa a Ihowā te Atua o te Mana o te Kaha:

Kī tonu te rangi me te whenua i tōu korōria. Kia hira ake tōu nui i runga rawa.

Kia whakapaingia a Ia e haere mai nei i runga i to ingoa o te Ariki:

Kia hira ake tōu nui i runga rawa.

Te Inoi Whakatapu  Me tuturi

Pirihi anake

Kia hira ake te korōria te whakawhetai ki a koe e te Matua Tapu, mōu i hōmai i tāu Tama i a Ihu Karaiti hei tino patunga tapu mō te hara o te ao, kia whiwhi ai ki te ora tonu te hunga e manako ana ki a Ia, Nāna hoki te whakahau kia maharatia tōna matenga ā kia hoki mai rā anō Ia. Koia mātou e whakarite nei i te kupu tapu a tāu Tama a Ihu Karaiti i tāna pounga i tēnei Hākarameta Tapu:

Waihoki, nō te pō i mua i tōna rīpekatanga, ka tango Ia i te Taro, ā, ka mutu te whakawhetai ka whawhati, ka hoatu ki āna akonga, ā, ka mea: Tangohia, kainga: Ko tōku tinana tēnei ka tukua nei mō koutou: meinga tēnei hei whakamahara ki ahau.

Ka mutu te hapa, ka mau Ia ki te Kapu, ā, ka mutu te whakawhetai ka hoatu ki a rātou, ka mea: Inumia tēnei e koutou katoa. Ko ōku toto ēnei ka whakahekea mō koutou, mō te tokomaha, hei murunga hara. Meinga tēnei i ngā inumanga katoatanga, hei whakamahara ki ahau.

Nō reira e te Matua Tapu, mōna i whakaae kia whakamatea Ia ki runga i te rīpeka, ka whakareia e koe ki runga rawa, hoatu ana ki a Ia he ingoa kei runga ake i ngā ingoa katoa e taea te whakahua i te rangi, i te whenua, i raro i te whenua;
Koia hoki mātou ka tuohu ai, ka whakaae ai Ko Ihu Karaiti te Ariki, hei whakakorōria i a koe e te Matua Tapu.

Minenga

Kia whakakorōriatia koe e Ihu e te Ariki. Ka whakaatu mātou i tōu matenga. Ka pānui i tōu whakaaranga, Ka tatari atu i tōu hokinga mai. Āe rā: Nāu mai e Ihu e te Ariki.

Tāpae Tuarua

Pirihi

Waihoki e te Matua Aroha, i a mātou e tatari atu nei ki te taenga mai o tōu rangatiratanga, tēnei mātou te whakarite nei i te ōhākī a tāu Tama, kia maumahara ki tō mātou hokonga ki tēnei Taro o te Ora; ki tēnei Kapu o te Whakaoranga. Ahakoa kāhore mātou e tau, manakohia mai rā mātou, me ēnei whakamoemiti,
whakawhetai hoki, ka tāpaea atu nei.
Whakakīa mātou ki tōu Wairua Tapu:
Mā tōna aroha noa me tōna mana e mea mātou kia kotahi kua whakawhiwhia nei ki ēnei mea tapu, kia uru atu hoki ki te tinana o Ihu Karaiti.

Minenga

Ki a koe e te Matua Kaha Rawa,
Te korōria me te hōnore, te whakanui,
te whakapai,
i konei, i ngā wāhi katoa;
Ināianei, ā, mō ake tonu atu, Āmine.

Inoi a te Ariki

Kua akona nei tātou e te tātou Ariki,
ka inoi tātou

E tō mātou Matua i te rangi
Kia tapu tōu Ingoa.
Kia tae mai tōu rangatiratanga.
Kia meatia tāu e pai ai
ki runga ki te whenua,
kia rite anō ki tō te rangi.
Hōmai ki a mātou āianei
he taro mā mātou mō tēnei rā.
Murua ō mātou hara,
Me mātou hoki e muru nei
i ō te hunga e hara ana ki a mātou.
Aua hoki mātou e kawea kia whakawaia;
Engari whakaorangia mātou i te kino:
Nōu hoki te rangatiratanga, te kaha,
me te korōria,
Āke ake ake.     Āmine.

Te Whatiwhatinga i te Taro

Pirihi

Ko te taro e whatiwhatīa nei e tātou,
he tohanga nō te tinana o te Karaiti.

Minenga

Ko tātou tokomaha he tinana kotahi:
nō te mea e kai tahi ana tātou i te tinana
kotahi.

Inoi Whakapāpaku

E te Ariki tohu, ehara i te mea he whakapakari
ki a mātou mahi tika i haere mai ai mātou ki tāu tepu
e tū nei, engari he whakaaro ki te nui o āu mahi tohu.
Kāhore mātou e tau hei kohikohi i ngā kongakonga
i raro i tāu tepu; otirā, ko taua Ihowā nei anō koe,

he mahi tūturu nāu te atawhai.
Meinga kia tika tā mātou kai
i te tinana o tāu Tama aroha, o Ihu Karaiti,
kia tika tā mātou inu i ōna toto,
kia noho tonu ai mātou ki roto ki a Ia,
me Ia hoki ki roto i a mātou.    Āmine.

Te Reme a Te Atua ko tēnei rānei

E te Reme a te Atua, e waha atu nei i te
hara o te ao, tohungia mātou.
E te Reme a te Atua, e waha atu nei i te
hara o te ao, tohungia mātou.
E te Reme a te Atua e waha atu nei i te
hara o te ao, whakarongo ki tā mātou inoi.

Te Karanga

Pirihi

Haere mai koutou, tangohia te tinana me ngā toto o tō tātou Ariki o Ihu Karaiti, hei whakamahara i mate Ia mō koutou. Kainga whakaponotia i roto i ō koutou ngākau, me te whakawhetai anō.

Ngā Kupu Toha

Minita

Te tinana o tō tātou Ariki i tukua mōu.
Ngā toto o tō tātou Ariki i whakahekea mōu.

Poroporoaki

Minenga

E te Matua aroha, kua manakohia nei mātou, kua whāngaia ki ēnei kai tapu, āra, ki te tinana, ki ngā toto o tō mātou Kai-whakaora, o Ihu Karaiti hei manaaki, hei whakakaha i a mātou i ōna huanga, hei tuitui hoki i a mātou ki a Ia, tētahi hoki ki tētahi. Tēnei mātou te whakawhetai nei ki a koe i a mātou ka haere atu ki ngā mahi i karangatia e koe.

Tukua mātou kia haere i runga i te rangimārie, i a mātou ka whiwhi nei ki tāu whakaoranga.

Te Manaakitanga

Pirihi

Haeremai, haere,
ki te ao whānui i runga i te rangimārie.
Kia māia, kia kaha.
Kia ū ki te mea tika.
Kaua e utua te kino ki te kino
engari manaakitia,
ngā hunga e tūkino ana i a koe.
Kua riro mai nei i a koutou te mārama,
tohaina ki te ao.
Āmine.

Ko Tēnei Rānei

Kia ū ki tō koutou Ariki;
mahi atu ki a Ia i runga i te hari
i runga hoki i te mana
o te Wairua Tapu.
Āmine.

Ko Tēnei Rānei

Kia tau mai anō ki a koutou,
ngā manaakitanga a te Atua Kaha Rawa,
a te Matua, a te Tama, a te Wairua Tapu.
Āmine.

A New Zealand Prayer Book | He Karakia Mihinare o Aotearoa

Go to: Contents Page